270 ақтөбелік отбасы Тұрғын үй құрылыс жинақ банкінен пәтер кілттерін алды

17 Мая 2016 1537 Тұрғынүйқұрылысжинақбанкі, Ақтөбеоблысы, пәтер

Алматы. 17 мамыр. Ақпараттар орталығы. Ақтөбе облысының әкімі Бердібек Сапарбаев 270 ақтөбелік отбасыға, «Тұрғын үй құрылыс жинақ банкі» салымшыларына жаңа пәтер кілттерін табыстады, деп хабарлады әкімнің баспасөз қызметінен.

Жаңа пәтерлер «2020 жылға дейін өңірлерді дамыту» бағдарламасы бойынша «Нұр Ақтөбе» тұрғын үй массивінде тұрғызылған. Салтанатты шараға «Тұрғын үй құрылыс жинақ банкі» АҚ басқармасының төрағасы Айбатыр Жұмағұлов қатысты.

Жаңа үйге қоныстанушыларды Б.Сапарбаев құттықтап, өңірлерді дамыту бағдарламасы аясында «Тұрғындардың барлық санатына арналған баспана» бағыты бойынша Ақтөбе облысында 14 тұрғын үй пайдалануға берілген, өңірдің 2 832 тұрғыны өз пәтерлеріне қоныстанды. «Жас отбасыларға арналған баспана» бағыты бойынша 432 пәтері бар 2 үй тұрғызылды.

Хабарда айтылғандай, аталмыш мембағдарлама аясында тұрғызылған тұрғын үй бағасы нарықтағыдан төмен екен. Мәселен, бүгін берілген көп қабатты үйдегі пәтерлердің 1 шаршы метрінің құны 100 мың теңгені құрайды.

«Тәуелсіздіктің алғашқы күндерінен бастап мемлекеттің әлеуметтік бағдарламасы халықты жан-жақты әлеуметтік қорғау мен оларды баспанамен қамтуға бағытталған. 2020 жылға дейін өңірлерді дамыту бағдарламасы, сондай-ақ «Нұрлы жол» бағдарламасы аясында тұрғын үй инфрақұрылымын дамыту азаматтардың тұрақты баспанемен қамтылу туралы конституциялық құқығын жүзеге асыру құралы болып табылады. Ағымдағы жылы Ақтөбе облысында 580 мың шаршы метр пәтер пайдалануға беріледі. Жаңа пәтермен барлығы 5 мыңдай отбасы қамтылатын болады», - деді Б. Сапарбаев.

Барлығы соңғы 5 жылда қаржыландырудың барлық көздері есебінен Ақтөбе облысында 2,3 млн астам шаршы метр пәтер пайдалануға берілді. Әкімнің айтуынша, бұл 19 мыңнан астам отбасының тұрғын үй жағдайын жақсартуға мүмкіндік берді. Хабарда айтылғандай, облыс әкімінің бастамасымен өңірде тұрғын үй кластерін қалыптастыру бойынша жұмыстар жүргізілуде. Бұл қадамдар болашақта тұрғын үй құрылысын қарқынды етуге және тұрғын үй шаршы метрінің құнын төмендетуге мүмкіндік береді.